Monthly Archives

November 2013

Nýr framkvæmdastjóri Félagsbústaða

By | Fréttir

Stjórn Félagsbústaða hefur ráðið Auðun Frey Ingvarsson sem framkvæmdastjóra félagsins og mun hann hefja störf 1.desember næstkomandi. Hann tekur við keflinu af Sigurði Kr. Friðrikssyni sem stýrt hefur fyrirtækinu farsællega frá stofnun þess árið 1997.

Félagsbústaðir eru hlutafélag í eigu Reykjavíkurborgar, sem á og leigir út ríflega 2.200 félagslegar íbúðir í Reykjavík. Árlegar tekjur félagsins eru yfir 3 milljarðar og stærð efnahagsreiknings þess er yfir 40 milljarðar.

Undanfarin misseri hefur Auðun Freyr verið framkvæmdastjóri sprotafyrirtækisins Green in Blue og unnið sem sjálfstæður ráðgjafi. Hann hefur á undanförnum árum setið í stjórn Distic hf. og Félagsbústaða hf., auk fleiri fyrirtækja hér á landi og erlendis. Á árunum 2006-2009 var Auðun Freyr framkvæmdastjóri hjá Norvik Group þar sem hann stýrði rekstri og uppbyggingu iðnfyrirtækja Norvik í Evrópu og í Rússlandi. Áður var hann sjálfstætt starfandi ráðgjafi við verkefnastjórnun og stjórnun nýframkvæmda fyrir íslensk fyrirtæki s.s. BYKO, Orkuveitu Reykjavíkur, ÁTVR og Steinullarverksmiðjuna.

Auðun Freyr er menntaður véla- og iðnaðarverkfræðingur frá Háskóla Íslands. Hann lauk meistaranámi í aðgerðagreiningu frá Cornell árið 2004 og meistaranámi í viðskiptum og stjórnun frá Stanford árið 2006.

Varðar reikningsskil Félagsbústaða hf. vegna áranna 2011 og 2012

By | Fréttir


Við
eftirlit með reikningsskilum Félagsbústaða hf. fyrir reikningsárið 2011 kom í
ljós að ársreikningur félagsins var ekki gerður og settur fram í samræmi við
alþjóðlega reikningsskilastaðla (IFRS). Hinn 29 maí 2012 ákvarðaði ársreikningaskrá
ríkisskattstjóra að félaginu væri skylt að beita IFRS við gerð og framsetningu
ársreikninga sinna í samræmi við ákvæði 90.gr. laga nr. 3/2006 um ársreikninga.
Hinn 21. júlí 2013 staðfesti atvinnuvega- og nýsköpunarráðuneytið ákvörðun
ársreikningaskrár en félagið hafði kært ákvörðun ársreikningaskrár til
ráðuneytisins.

Stefnt er að endurgerð reikningsskila félagsins í samræmi
við alþjóðlega reikningsskilastaðla og birtingu þeirra vegna reikningsáranna
2011 og 2012 verði lokið fyrir 31. janúar 2014.

Sjá fréttatilkynninguna á heimasíðu Kauphallar Íslands