Sigrún Árnadóttir, framkvæmdastjóri Félagsbústaða, tilkynnti stjórn félagsins á stjórnarfundi 20. apríl sl. ákvörðun sína um að segja starfi sínu lausu en hún hefur gegnt starfinu í hartnær 8 ár.
Í bréfi Sigrúnar til stjórnar segir m.a. „Ég vil þakka ykkur, það traust sem þið hafið auðsýnt mér og það góða samstarf sem við höfum átt, ekki hvað síst þakka ég stjórnarformanni þétt og gott samstarf. Stjórn og framkvæmdastjórn Félagsbústaða hafa í sameiningu unnið að málefnum félagsins af heilindum og eindrægni. Félagið hefur mikilvægu samfélagslegu hlutverki og verkefnum að gegna og það er trú mín að það sé nú vel í stakk búið til að valda því hlutverki og mæta þörfum þeirra sem reiða sig á þjónustu þess. Áskoranirnar hafa verið margar, bæði fyrir stjórn og mig sem framkvæmdastjóra, en okkur hefur tekist í sameiningu að leysa úr þeim af festu og sanngirni, ávallt með það að leiðarljósi að styrkja Félagsbústaði til það að geta rækt þjónustuhlutverk sitt. Það hefur verið bæði gefandi og lærdómsríkt að starfa fyrir Félagsbústaði. Ég þakka fyrir mig og óska félaginu, starfsfólki og stjórninni allrar farsældar.“
Stjórn Félagsbústaða bókaði þakkir til Sigrúnar fyrir framlag hennar undanfarin átta ár. Eftirfarandi var fært til bókar þegar starfslok Sigrúnar komu til umræðu.
„Félagsbústaðir hafa á undanförnum árum markvisst unnið að því að stækka eignasafn félagsins og styrkja reksturinn og hefur Sigrún leikið þar lykilhlutverk. Félagsbústaðir eru í dag nútímalegt fasteignafélag sem mætir kröfum samtímans og er með tæplega 3200 leiguíbúðir í sinni eigu. Ánægja leigjenda með þjónustu félagsins og með húsnæði sem það leigir hefur vaxið frá einni mælingu til annarrar frá 2019. Stjórn Félagsbústaða þakkar Sigrúnu kærlega fyrir metnaðarfullt og óeigingjarnt starf undanfarin ár í þágu félagsins. Þá þakkar stjórn fyrir ánægjulegt og farsælt samstarf og óskar Sigrúnu velfarnaðar.“
Auglýst hefur verið eftir nýjum framkvæmdastjóra Félagsbústaða, sjá www.hagvangur.is.
