AÐ BÚA Í FJÖLBÝLI

Félagsbústaðir leggja mikið upp úr því að sambýli í fjölbýlishúsum þar sem félagið á íbúðir gangi sem best, fólk taki tillit til hvors annars og líði almennt vel. Í leigusamningi fara þjónusturáðgjafar yfir almennar umgengnisreglur í fjölbýlishúsum og leiðbeina tilvonandi leigjendum eftir því sem við á að sinna þeim skyldum og ábyrgð sem því fylgir að búa í fjölbýlishúsi. 

Til að tryggja farsæla samvist er sérstaklega mikilvægt að gæta að því að:

• Sýna tillitsemi, hafa í huga að valda öðrum íbúum sem minnstu ónæði og gæta þess að vera ekki með hávaða, háreysti, háværa tónlist og óþarfa umgang í sameign milli kl. 22 á kvöldin og 7 á morgnana.
• Ganga þrifalega um sameiginleg rými og geyma ekki muni, umbúðir, rusl eða annað í sameign, í hjólageymslum eða öðrum sameiginlegum rýmum. Vélhjól skulu undantekningarlaust geymd utandyra, bíldekk inn í geymslum og reiðhjól í hjólageymslum. Rusli skal hent í ruslatunnur eða farið með það í Sorpu.
• Fylgja skal reglum um dýrahald í fjölbýlishúsum. Félagsbústaðir eru almennt samþykkir dýrahaldi í íbúðum félagsins, þó að hámarki einu dýri í hverri íbúð, enda sé dýrahaldið í samræmi við lög um fjöleignarhús nr. 26/1994, húsreglur og almennar umgengnisreglur. Athygli er vakin á því að í einstaka húsum Félagsbústaða er dýrahald óheimilt, þar gilda sérstakar húsreglur. Íbúum ber að sjá til þess að vel sé búið að dýrinu, að það valdi ekki ama, ónæði eða óþægindum og að það sé aðeins í sameign eða á sameiginlegri lóð þegar verið er að færa það til og frá íbúð. Sé um hund að ræða skal hann ávallt vera í taumi og í umsjá einstaklings sem hefur fulla stjórn á honum. Skoða reglur um gæludýrahald.
• Sinna sameignarskyldum, þar sem við á, sem felast oftast í því að ryksuga stigagang, skúra, þrífa rúður, þurrka af og skipta um ruslatunnur. 
• Gæta sérstaklega að því að reykingalykt berist ekki fram á stigagang eða í sameiginleg rými og passa eftir ítrasta megni upp á að reykingar hafi ekki áhrif á nágranna.