Fyrsta skóflustunga að byggingu sex íbúða húss við Brekknaás 6 var tekin á fallegum sumardegi nú í ágúst. Bygging hússins er liður í uppbyggingaráætlun Reykjavíkurborgar fyrir fatlað fólk.
Húsið og umhverfi þess, er hannað með tilliti til þarfa væntanlegra íbúa hússins og er ætlað að auka lífsgæði þeirra til muna en þeir hafasértækar þarfir og þurfa stuðning til daglegra athafna. Við hönnun íbúðakjarnans var ítarleg þarfagreining unnin í samstarfi við vinnuhóp fagaðila, með aðkomu aðstandenda. Þarfagreiningin lá til grundvallar ákvörðunum hvað varðar efnisval, hljóðvist, stýringu dagsbirtu, læsileika o.fl. og við hönnunina voru þróaðar ýmsar sértækar lausnir.
Áherslur innan fötlunarfræðinnar eru í stöðugri þróun og í hönnun íbúðarkjarnans og lóðarinnar er leitast við að mæta þessari þróun
Húsið verður 640 m2 á einni hæð og auk íbúða verður góð aðstaða fyrir starfsfólk en það er talinn nauðsynlegur þáttur í að byggja upp öryggi og vellíðan fyrir íbúa jafnt sem starfsfólk.
Arkitektar hússins eru Eva Huld Friðriksdóttir og Magnea Guðmundsdóttir frá Teiknistofunni Stiku og Birta Fróðadóttir arkitekt.
Lóðahönnun er í umsjón Landmótunar.
Hnit verkfræðistofa sá um hönnun burðarþols, lagna og raflagna.
E. Sigurðsson ehf. sér um byggingu hússins.
VSB framkvæmdir ehf. annast byggingastjórn og byggingaeftirlit.
Áætlað er að framkvæmdum við bygginguna verði lokið í nóvember 2024.
